لبنى ابيضار تتعاطف مع الكوميدي السعودي الذي سخر من المغربيات و هذا ما قالته

“بحال ديما موضوع اخر نتلهاو فيه شي شوية بينما بان عظم جديد نعاودو نقددوه… نباح جماعي و تقداد جماعي…
سعودي ففقرة كوميدية ديالو لمح للمغرب و اقول لمح لانه لم يتكلم بالمباشر مباشرة و كيفما كايقول المثل مول الفز كايقفز ناضت القيامة فالفايسبوك و خاصنا نقطعو العلاقات الديبلوماسية مع الشعودية و السواعدة حيث كايشوهو السمعة د البلاد و حنا بزاف عليهم حراااااام واش فينا نقطة من هاد الشي للي كايقولو السواعدا علينا…
قبل منها مخرج مغربي نبيل عيوش دوا على ظاهرة الدعارة و كيف العادة نفس النباح و التكشير على الانياب و استعراض الحبال الصوتية و خاصنا نقطعو العلاقات الديبلوماسية مع المغرب و و المغاربة حيث كايشوهو السمعة د البلاد و حراااااام واش فينا نقطة من هاد الشي للي كايقولو المغاربا علينا… اه مغربي!!! ولكن راه يهودي يعني ماشي مغربي… نفس الوقت كنت ممثلة فهاد الفيلم و ناضو النباحة حقا و الواد كاتشوه صورة المغاربة اه ولكن حتا هي مغربية!!! ولكن..عاهرة يعني ماشي مغربية…
تناقض كايهربو منو للتناقض باش يبررو التناقض للي كايعيشو فيه المغاربة للي هما نفسهم كايقسمو نفسهم لفئات كل فئة تدعي انها احسن من الاخرى و كايقسمو روسهم لافراد كيدعي كل فرد انه افضل من الاخرين…
راه الحل كيف ديما كانقول ماشي هو دفين الراس فالرملة باش تغمض عينيك و تخلي مؤخرتك عريانا ولا تستفد من هاتف ذكي ادكى منك و بكونيكسيون للي كاتطيح عليك فابر و تشمر دراعك و تسنا اي شخص يوريك عيبك و تطلق عليه بالسبان و المعيار… لا بلاصت ماتدير هاد الشي خرج للحياة و واجه خوفك منها و من راسك و حل عينيك و شوف الواقع للي انت سبب رئيسي فيه و مساهم باش رجعتيه هاك شوف مزيان بلي الحوايج للي كاتقول عليها ماكايناش الا فدماغ هادا ولا هادي للي كاتختازعها و تدوي عليها غير باش تشوه سمعة البلاد الا شفتي مزيان راه غاتبان لك كاينا
كاينا بيك ولا بلا بك الدعارة كاينا و التفاق كاين و انت براسك كاتخلص وحدة باش تديها بالتخبية و قدام الناس ملي تبان لك دايزا كاتخرج بالزربة تسبيحك و تقول اللهم انا هذا منكر هاد الشي ماشي اخلاقنا…
فيق و شوف مزيان و بلاصت ماتسب للي كايدوي على هاد الشي باش يتلقاو له حلول ديال بالصح سب راسك انت حيث عايش فيه و وسطو و يمكن به ولكن كاتقاوم راسك باش ماتعتارفش به…”